«Դե Ֆակտո» 7 (2007թ.)

Իր յուրահատուկ համով  սունկն ընդհանրապես  ախորժելի  է դարձնում ցանկացած աղցան ու ճաշատեսակ։ Որքան հոգատարություն այն պահանջում է իր նկատմամբ մինչ աճելը, այնքան էլ մեծ հաճույք է պատճառում իր հաղորդած առանձնահատուկ համով։

Այսուհետ վաճառքում կարելի է հանդիպել նոր սնկատեսակ` Plieurotus տեսակի կախասունկ (Вешенка)։ Կախասունկն ունի մի շարք առավելություններ այլ սնկատեսակների նկատմամբ։ Այն ողջ Եվրոպայում և արևմուտքում հայտնի է որպես դելիկատ ուտեստ։

-    Կախասունկն աճեցվում է եգիպտացորենի և գարու ստերիլ ծղոտի վրա` առանց որևէ հավելումների։ Սա է պատճառը, որ այն էկոլոգիապես մաքուր արտադրանք է։ Շուկայում  կախասունկ կարելի է հանդիպել ինչպես թարմ, այնպես էլ մարինացված վիճակում,- նշեց կախասնկի աճեցմամբ զբաղվող գործարար Միքայել Բադալյանը։

Միքայել Բադալյանը Հայաստանում կախասնկի արտադրությամբ զբաղվում է  վաղուց, ՀՀ-ում սնկի այս տեսակի արտադրության հիմնադիրներից մեկն է, և շուտով արտադրական հզորությունների ընդլայնման արդյունքում վերջինիս արտադրանքը կբավարարի սպառողների պահանջարկը։

Բացի համեղ լինելուց, կախասունկը  նաև օգտակար սննդատեսակ է։ Այն նպաստում է մարդու օրգանիզմում արյան շրջանառության, նյութափոխանակության կարգավորմանը, իջեցնում է խոլեստերինի քանակը, կանխարգելիչ ազդեցություն ունի քաղցկեղային ուռուցքների նկատմամբ և այլն։ Դա է պատճառը, որ աշխարհի շատ երկրներում այն օգտագործվում է բուժական նպատակներով։  Կախասունկը պարունակում է 43%  կարբոհիդրատ, 5.5%  յուղեր և 8% հանքանյութեր։ Այս սնկատեսակը հարուստ է C, E, P, PP  խմբի, ինչպես նաև B խմբի վիտամիններով։  Միքայել Բադալյանի խոսքով` իրենք նպատակ ունեն ապագայում արտադրել նաև կախասնկի փոշի, որը մեծ քանակությամբ պրոտեին է պարունակում։

-  Շուկայում շուտով սպառողներին կներկայացվի նաև  կախասնկի մուրաբա։ Անշուշտ, աշխարհում այն եզակի արտադրատեսակներից է։

Գնային առումով կախասունկը բավականին մատչելի է։ Թեև կարճ ժամանակ է, ինչ  այն արտադրվում է Հայաստանում, սակայն արդեն ունի սպառման լայն ցանց։ Այն շատ համեղ է ինչպես աղցանների, այնպես էլ  հավի, տավարի մսով  պատրաստված ճաշատեսակների ու կոտլետների բաղադրության մեջ։  Նպատակ  կա նաև  հրատարակել  բաղադրատոմսեր, որոնք հնարավորություն կտան գնորդին  վայելել կախասունկն ամենատարբեր ճաշատեսակներում։ Ի դեպ, պատրաստման  ընթացքում կախասունկը չի կորցնում իր օգտակարությունը։

-  Ավելացնեմ, որ ներկայումս աշխատանքներ են տարվում կախասնկի յուղի արտադրության  ուղղությամբ, որը  նպատակահարմար է օգտագործել բուժական նպատակներով։ Մի խոսքով, նախատեսում ենք շատ կարճ ժամանակահատվածում ՀՀ-ում հիմնադրել գիտարտադրական մի կենտրոն, որը կզբաղվի այդքան արժեքավոր արտադրանքի՝ կախասնկի արտադրությամբ և վերամշակմամբ։ 

                                                                         Սուսաննա Թամազյան